أبوذيات عراقية

.

.

.

أحباب النحبهم ما رادونه
جفونه وبجفاهم مردونه
ولك صرت طوبة برجل مردونه
مدگللي بعد يا كولجي اليلحك عليه

أحبابي شلون حالتكم بعدنه
شبدينه والوكت عنكم بعدنه
إذا انتم نسيتونه ترانه بعدنه
نذكرهم بكل صباح وبكل مسيه

أحبك ما أحب عله الأرض سواك
سبحان الذي من طين سواك
بشر لكن ويه الگمر سواك
واحد فوك وواحد بين ايديه

الدنيا خلافك وحشة ومره
ولا منك بعد جيه ومره
صورك مره أضمنهه ومره
أشوفنهه توج نيران بيه

بسك لا تضل تشكي بهمك
وتلوم العين وتعضعض بهامك
اخذ طبع النخل وارفع بهاماك
وإذا بالطين عرگك هاي هيه

تلوعنه وشفنه كل حلاوتهم ومرهم
والروح تمشي عله طوعهم وأمرهم
حبيبي دوه لجروحي ومرهم
تمنيته يجي ويحن عليه

جدري غله مايه وأبد ما فار
وما بقه ببيتي جريدي ولا فار
ولانه مكمل الخدمة ولا فار
أركض والعريف يدك عليه

جمالك زاد عن يوسف وقبله
وحبك صار لي منبر وقبله
أمر عل الصخر يا زين واقبله
لأن گلبك صخر ما حن عليه

حبيبي انته ونظر عيني ودربي
عيونك بحر بي لؤلؤ ودر بي
انته ليگا وكالتشيو وديربي
بس أريدك يوم تحن عليه

دخنت من التتن دنهل وسومر
وگلبي من هواكم زنجر وسومر
أحبكم من عهد بابل وسومر
ولك حته حمورابي انكسر گلبه عليه

ركبني من الوله جني ومارد
رسلت له رسالة باشواگي وما رد
طلبته يقترب مني وما راد
أسألك ربي تجمعنه سويه

سماح أطلب أنه منكم وهدنه
كمش بيد التعورنه وهدنه
جبل راكع خجل جيتك وهدنه
أصير تراب وانته اسحگ عليه

شد حيلك عله الأيام شده
وإذا حبل الأمل رخيان شده
واصبر عله الأيام إن بيهه شده
طعم الفرج بعدين ينسي الأذية

كثر بحسنك وبجمالك وصفنه
لأن حبك يرادله گعده وصفنه
تمنيتك تصير بمدرستنه وبصفنه
إذا تاخذ صفر ننطيك ميه

كحل بالعين أحبابي يحطون
وحمره مسومرة بشفايفهم يحطون
ياليت أهلك بجنب أهلي يحطون
وننام ثنينه ونلتف سويه

لا راهب عرف علتي ولا قِس
ولا ليلى ابتلت مثلي ولا قِيس
بعد مـا أحسب لزلاتك ولا قٌُِيس
راضي شما يريد يصير بيه

مثل غيم الشتا همي تراكم
ومته عيني يا أحبابي تراكم
شهور سنين غيبتكم تراكم
وحيد ولا عزيز اليمر بيه

مره أسكت عنكم مره سايل
مره الدمع ناشف مره سايل
أحتار شكتبلكم من رسايل
مره أنطر رسايلكم اليه

مسكين ساقي الناس مايكسب ولاهم
بأيامك السود ما ينفعك لا آنه ولا هم
عشت كل العمر لا ضيقه ولا هم
وهسه الهموم جبال تتحاذف عليه

وسط گلبي يظل طابع وسمهه
عسل صافي حلو مرهه وسمهه
صفيت متيه باسمي واسمهه
لأن هيه النجم وآنه الثرية

يالبعت بيه فرد اليوم أبيعك جمل
ماريد آنه خوتك المسوي بيهه جميل
اطلع بكيفك والباب يوسع جمل
من عافنه عفناه روحه بلا جيه

انت للگلب والروح مالك
صرت كلي الك يا ترف مالك
تصد عني وتدير الوجه مالك
وتعذبني وتحملني الأذيه

سبحان من صورك ميثاق حلاك
جميل وعلي يصعب بالوصف حلاك
أتمنه آنه مگــص باطراف حلاك
أگص شعرك واحفظه براحة اديه

الحزن بگليبي يحبابي تراكم
ثگيل ولاتسألوني تره كم
مته تعودون وعيوني تراكم
وافك خدي واحني چفوف ايديه

نون والزيتون طه والفلق والناس
وراسك ما بقه لي بـهالخلق ونّاس
يهل العيد لـِصار الحشر والناس
ويزيد الهم يابدر من تعتب عليّه

ظلام الناس عاداني ونهارهه
أريد أسبح بيمهه و نهرهه
تهيم النفس وازجرها وانهرها
واشيل ابساع لن حبكم بليّه

قسم بالله وهاذي تره يمناي
لو چاذب تِنْشَلْ عَسَنْ يمناي
يوم ألگاك يوم السعد يمناي
ويوم تغيب لن وحشه عليّه

حبيبي ياضوه گلبي وعيناي
ونغمة لحنها بروحي وعناي
يعينك من تعالى اسمه ويعيناي
على حب بتلينه بي سويه

جاني العيد وما سوينه رحله
وگلبي يصيح يلله گوم رح لـه
ترد وترجع البسمه و الروح له
إذا جيته واذا عشنه سويــــــه

أحبه وروحي تگول همله
والگلب خايف يزيـد الهم له
مثل ما إلك هم لازم تهم له
ولا تصير نذل نفسه دنيه

أحبه ورعشته بحشاي بطها
جمّع أوصالي برزمه وربطها
چن الجوارح تهاب طيور بطها
ربي دخيلك لا تسلطهن عليّه

ألف مليون مرحب بالهوى وأهلا
لن طاحت عـيني بعينكم وهله
ومن يهوى الهوى ملزوم يحب أهله
ضريبه تندفع غصبن عليّه

وحگ اللي نكبّر دوم باسمه
الوكت مايوم منّه شفت بسمه
عله مِكدر غبار وغيم بسماه
وزلازل بالأرض وتموج بيّه

سبحان رب الخلايق الوهب لك عينان
والله لفجر بأرض حبنه عينان
وصوت شوگي إلك أوصله للعنان
بس يا ليتك تجي وتحن عليَه

أهديك يابدر أبيات شعري
وآنه بوسط البحر صايد شعري
ايد تمسك الخيط وثانيه تحك شعري
انگطع خيطي وطار ودامي من اديه

مافارگو الليالي سنين مرن
وعلي صاير لذيذ الزاد مرن
طفر گلبي على النقال من رن
لأن حسيت روحي ادك عليه

يا ولفي هاك اخذ روحي وردها
وذبل بجفاك لو تدري وردها
الكلمة توصل لساني واردها
خجل مو خوف وخله الشوك بيه

يادنيه خف عزم روحي وگلبي
وبيدج دفتر ذكرياتي وگلبي
وبمحبتچ يشهد لساني وگلبي
وبغيابچ دمع العين وصفار الوجه بيه

گمت ما أرفس برجلي ولادج
وما أطعن اليطعني ولادج
جزيره وماشفت بيهه ولا ديچ
اليعوعي الصبح ويگعد البريه

نبتت بوسط الگلب من الونين شجره
لا صاح عني السأل لا گال بيه اشجره
شكثر فوك الوجن ماتدري دمعي اشجره
جره دموم بدال الدمع من غصبن عليه

أحبك مو كفر حبي ولاجرام
وشصبر بالصبر من بعدك ولاجرام
الكواكب حولك افترن ولاجرام
چي لنك شمس وازود شويه

الغيرك مايگول الگلب مرحب
ومن أبـعــد أشوفك صحت مرحب
مثل طبرة علي من طبر مرحب
طبر جسمي هواك وعمل بيه

وحق من كوّن الأكوان وحده
سره ضعن الأحبه بليل وحده
بهودج يا صديقي شفت وحده
حسنهه يشع شبيه البدر ضيه

ترف وياي ليش خلفت وعداك
بصدودك شمتيت عداي وعداك
أضنك عاشرت مجروب وعداك
مثل هذا السره بين البريه

حلو طبعك حبيبي من تعادي
حكمت گلبي قساوة ونته عادي
تمنيتك حبيبي من تعادي
تعادي الناس اليوزونك عليه

شكثر يحباب گلبي ضامي الكم
مته تلفون واشكي ضيمي الكم
شگد عندي سوالف ضام الكم
أكتهه ويه الدمع لو جيتو ليه

يعلمني الزمان دروس وانسه
وعلى حالي بچت رضعان ونسه
آنه الچنت للطيبين ونسه
صرت مكروه دنيه وآخريه

نار الگلب تلهب منه كبره
وإذا من نفسي ما أبره منك أبره
هاك الخيط مني ومنك ابره
نخيط جروحنه ونلتم سويه

يروحي بطلي المعاشر وعودي
سباني ونحل عضامي وعودي
آنه الما خنت مره وعودي
عجب ليش الحبيب يخون بيه

على خدي نزل دمعي ونشفه
دحط ايدك على گلبي ونه أشفه
إذا منك تجي شفه ومني شفه
نموت ثنينه بالحب سويه

ثوب الحزن بفراگك لبسنه
وثگيل الطبع طبعه لو لبسنه
ولك خدك ماوصلناله ولا بسنه
تزعل ليش يمدلل عليه

غرامك أثر بالعشگ وداره
هجرت الي تعب وياك وداره
سمعت بقيس عاف أهله وداره
حملت الضيم وهمومك سويه

سهامك وصلن لجبهتي ولاحن
وگلبك مابچه لحالي ولا حن
بليالي العيد لا أفرح ولا حن
لجلك يالگطعت الوصل بيه

ذبت وبنار هجرك مايع آني
وبقه گلبي يعاني ما يعاني
إذا تعطش أشربك ماي عيني
واجيب الروح لعيونك هديه

حبيبي دوم آنه أزورك وجيلك
إلك فدوه شلع جيلي وجيلك
بميزان الذهب قستك وچيِلك
طلع وزنك ذهب وراح من إديه

ياصاح هدني السفر دايم صلاتي قصر
هايم بأراضي العطش ونته ساكن بقصر
وآنه من زاخو أحن حته حدود أم قصر
كله لعيونك بس ارضه عليه

ياليل أرد انشدك مامش وراك نهار
مو حته صبري خلص وكل ما بنيته انهار
معقوله أموتن عطش وآنه بنص أنهار
يويلي عل جره والصار بيه

قضية اسمك على إسمك ما شخطنه
إزدحام إحنه على دربك وماشي خطنه
شتضن من گد حلاتك ما نشخطنه
والله ليشوفك ينشخط ميه بالميه

هاك الگلب بيدك حيل طحنه
أمس فوك النجوم واليوم طحنه
شبدينه وبالعشگ يا ناس طحنه
غشمه وگلوبنه تحب الأذيه

المشلول أبد ما تمتد يد له
وشفت مجنون إله عقله يدله
شمالچ ما بطل فورج يدله
تگلي أجوادكم شحوا عليه

أريد أبچي وألم الناس حولي
وأريد أشكي ضعف قوتي وحولي
يدنيه أحزان بسچ كافي حولي
خل مره يمر الفرح بيه

على گليبي أدور بليل وين تاه
وگبل ماتنسمع يا روح ونته
الدنيه والزمن ذبن عليه هموم ونته
تذب هموم وياهن عليه

صرت گهوه لحبيبي بوسط فنجان
فن إنس الي يوصله فن جان
إذا العاقل نضرلك نضره فنجن
وآنه المجنون وتگلي انظر اليه

شبه شجرة يخل طولك وعدلك
ولو گطعوني ما أعوفك وعد لك
آنه للعشرة راح أغمض واعدلك
متاني شفافك يمرن علي

علي هموم وزنه وألف وزنه
وكلام التسمعه بتفكير وزنه
ألف واشي عليكم تره وزنه
وألف يمك يوزونك عليه

أحب كل يوم أشوفك واشتمنك
وإذا تبعد أسبك واشتمنك
أسألني شراد گلبي وشتمنك
بوسط عيني فلا تبعد عليه

مغيمه سمه دنياي وأبد ماصحتلي
وردت فرصه أشوفك بيهه وما صحتلي
إجت عينك گبال عينى وما صحتلي
شجاك وگمت تتكبر عليه

محبوبي شگد حلو كل الحسن جامعه
ومو وحده إلي إجه كلمن حلو جامعه
على الأرض يمشي الگمر متعني للجامعه
وكل خطوه يمشيهه ترد الروح ليه

حلو صوتك يدك بالراس هاون
ها حن الگلب ها ناح ها ون
أرد يا حبيبي إلك ها وين
دبس تعال وروح هموم البيه

دويت بنار هجرك وانته طافي
وغرگت بحر حبك وانته طافي
صرت عاشوري إنته وانته طفي
وبحزانك گمت تردف عليه

گلبي من الصبر والله أذاني
فگدت شوفي ولساني وذاني
والوادم توظت تنطر أذاني
وانه من الحچي ما ضل صوت بيه

وحگ مخدرات الحسن بحيار
هاي الناس خلت عگلي بحيار
لون كل النبح نرميه بحيار
يصاحي خلصت حجار الوطيه

حبيبي العمر يركض ما يتاني
وآنه العطشان منك ماي أتاني
تعال اليوم باچر ميت آني
ولو بآخر نفس تلحگ عليه

آنه كل يوم أتعنالك وصل بيك
وعنادك وين يبن آدم وصل بيك
أحبك وشايل بجيبي وصل بيك
وباچر بيك ينطوني هويه

إيدي لليوم تنزف من رصيدك
لأن مرة إنته صايد مره صيدك
عليه اصرف دقيقة من رصيدك
وانه عوضك إذا تصرف عليه

يهل ترفس برجلينك ولك بس
عونه الطاف خدينك وإلك باس
إلك أسوه بحسن يوسف وإلك باس
ومثل يعگوب إلي ونته خفيه

النجم عالي بسماكم وسامي
وچنت تاج عله راسي وسامي
وجوه يامه فارگنه وأسامي
يمته من الحزن نرتاح شويه

أگوم إجلالا لحسنك وأقف لك
واسجل گلبي يا خلي وقف لك
وأحطك بي واقفلنه واقفلك
وأطب بصدرك واقفلكم عليه

بجهنم أرد اذب روحي وصلها
بسبب محد من أحبابي وصلها
الخوه ضاع معناها واصلها
وأصبح كل خوي ناكر خويه

جروحي تفت روحي ورمهه
وگلبي اشتاك للعشرة ورمهه
كتلتني بكل وكت تمشي ورمهه
أحچي وتلتفت أمهه عليه

الگلب نصين ليش تريد شطره
حبيبي عليك شنهو الجره شطره
واذا ينسد درب بغداد شطره
أجيك على السماوة أمشي عله ديه

ولك آمر يا بعد الروح آمـــر
إلك شرطي صرت وانته علي آمـر
أنفذ أمرك وممنون آمــــــر
لابس البيرية واخذلك تحيـــه

يراس المال إنت والتجارة
وعليك دموعي تهمل وتجاره
عونة الصار جارك ونته جاره
يشوفك كل صباح وكل مسيه

لا أعمه شاف حسراتي ولا صم
سمعتني وما حصل منك ولاصم
اليلمحك لا صلاة حصل ولا صوم
تفطره وينتعل سلفود أخيه

جرعت من الصبر كاسات مرة
ولا سني ضحك للوكت مره
يلرايح للحبيب أرجوك مره
وخبره هوه بفرح واني بأذيه

مهجتي سهام هجرانك ولنهه
وصفت تحرك بيابسهه ولنهه
أبشرك گمت لا أمر ولا نهه
الحچي المرتي وآنه الطاعة عليه

گبل ماتصير بيضة وچنت مح بس
صغتلك روحي آنه صياغ محبس
ببطن أمك وانضرك وانته محبوس
التسع تشهر قرن صارن عليه

حبيبي شلون ما أحبك ولا بيك
وأمك ما تحن مثلي ولا بيك
عساهن بيه لوعاتك ولا بيك
وأحول كل ألم منك إليه

الردية أبتعد عنهه وأرد منها
يحفرون بغمگ صوبي وأردمنها
من إيد الحلو شتطلب ورد منها
لو أنطيك ويا الورد ريه

نبيل وطبعك توافي وعيدك
وأحسبك من أعز ناسي وأعيدك
عيد الفرح عالوادم وعيدك
سرور وفرح وأيامك زهيه

أنته من العمام وموش كل عم
وحگك ما نحسب الخاص كالعام
عسن عيد الفرح والخير كل عام
يمر ولا تمر بيك الرديه

التكت إلهه سوالف والتكت لك
يگلبي عليك طاحت والتكتلك
بقه بس اليغثك والتكتلك
يجيك وحشر روحه بكل قضيه

شضر من الخلك شرتكب شاذي
فقير ولا شذوذ الكفر شاذي
تعال وشوف حالي صرت شاذي
لراس الركن ما ينطلع بيه

المعدن يبان صنفه من تبرده
يكرم ما يجي ابايدك من تبرده
حسبتك ستر شباچي منته برده
بنفخة هوه وتورج الناس بيه

يشامت حني رجلينك ودينك
طحت دستافي غاياتك ودينك
أحلفك بالنبي وربك ودينك
إگعد لا تشمت عداي بيه

كلنه وياك يا عراق ناسك وأهلك
وحته الگمر ضوه من شافك وأهلك
بحق طه وعلي دمر يا ربنه وإهلك
كلمن إلك راد بسوء نيه

أف من زماني وآه منه
عله اللي عشرتي وياه منه
أگله الدرب هاذه يگول لا منه
أگله فوت بيه يرد عليه

الشعر والأخوة والنت دعانه
انجمعنه وحب الشات دعانه
يارب الخلق إقبل دعانه
وتظل هاي الأخوه دائميه

أرد اجرحن إيدي والرجل والهام
وأقره قصايد عالشگَة والهم
وأغني لكاظم وحاتم وإلهام
كلش صعب يا عين فراگَچ عليه

أمير وچنت أگعدك دوم تحت تاج
وإذا تبعد عليه عضاي تحتاج
عفتني بس يجيلك يوم تحتاج
إلي وغصبن ما عليك تعود ليه

گلبي انته ملكته وانته حر بي
عليل وطبه عندك وانته حير بي
كاس السم أجرعه وانتحر بي
ولا غيرك يمس أطراف إديه

آنه أبقه هايم بحبك ولا هود
وقصتي لا مثل صالح ولا هود
ولا هي مثل موسه واليهود
قصتك مثل أهل الكهف صارت عليه

جبير الهم عله گلبي وعله جلاي
وماينفع دوه لعلتي ولا جلاي
ضربني ضربة محــمد علي جــلاي
ومن أول جولة طحت برديه

بعد ما أذكرج بحالي واشعرج
آنه بنثرج چنت نغمة و شعرج
تلاگن حظي و عيونچ و شعرج
سواد و صار يومي أظلم عليه

أصد وازعل وادير العين طبعا
لچن لچمات إلك بالگلب طبعن
حلو بكلشي لكن بيك طبعان
تشك وتغار بيهه عليه

حلو يلشعرج مفلفل فلافل
وحگ عيناج عن حبچ فلا فل
ولو العشرة وياج صمون وفلافل
دجاج تصير ومطبگ سويه

أعلن يا گلب حبك واشيعه
واتبع راي كل مخلص واشيعه
عيب حچاية السنة والشيعه
الوطن لأهل الوطن كلهم سويه

آنه الشيعي الحزين بزغر سني
أعض إيدي بندم وانكسر سني
من صار الچتل شيعي عله سني
والمحتل أمنيته أصبحت هيه

حبك قدر مكتوب منته قسمه
والواحد ماله ناتج من تقسمه
لون بسيوف گلبي من تقسمه
تشوف حبك شمسوي بيه

نسيت انته العشگ ذاكر تره آني
وگلبي مستوي وگلبك تره ني
طحت گدامك بعينك تراني
ودرت وجهك ولا چن تدري بيه

الزمن چتفني بهمومه وآنه حل
وجسمي من الوجد ذابل وناحل
اليطيح الله يگلوله ونه حيل
ترس بذني أسمعه يصيح بيه

بعد بطلت لا أعشگ وله اهوا
بسبب لا ماي ضل عندي ولا هوا
ابليس ودنيتي ونفسي والهوى
شلون أخلص إذا كلهم عليه

سلامي وصله بألله يا جمعه
وتگله شوفتك جمعه وجمعه
آنه مليت من دمعي واجمعه
يا روح الروح لا تبطي عليه

گلبي من الحزن ورث وعطب
وعيني إعله الطالع وعل طاب
حنيت لزادك وملحك وعطاب
لأن بس ملحك الغزر بيه

مرة أشوفكم مشمش مرة تين
وگلبي مو مرة حب مرتين
العنده مرة هلكان وانه مرتين
وحده ترفع والثانية تكبس بيه

بدمع عيني أكتبتلك خاطر آنه
وإلك ما يوم كاسر خاطر آنه
غير انته تجيني خاطر آنه
أجيلك متعني زحوف عله ديه

العمر ماي و تبده صعب لمه
وعلي نكبات دهري غدت لمه
گتله شوكت تفرح گال لمه
أشوف جنازتك تمرك عليه

حبيبي من تصب الچاي حله
وشعرك عله الوجنات حله
سألت عله المدينة وگال حله
خدوده والحواجب بابليه

حبيبي ماتجس نبضي شمالي
وبعد يمناي ما توصل شمالي
آنه الچنت العذيبي شمالي
صرت شرجي وعله العالم أذيه

چنت صافن وضربت أخماس بسداس
وبنيت أساس للمحبوب بس داس
صحيح انته لعبت وياي بس داس
خسرت وطيبتي العمت عليه

هجرك يا حلو صاير بلا حد
مثل سيف اليگص رگبة بلا حد
رحت عني وگلت ترجع بالأحد
إجه الأحد ولا جيت إنته ليه

حلفت ما أبچي عله فراگك ولا نوح
وبعد ما أردد بسمك ولا نوح
يوسف ما بتله مثلي ولا نوح
ولا يعقوب مر مثلي بأذيه

إخذ حچي الفكر والزنكيل واشباك
أطب للبيت گالوا شأخذ وشباك
الناس تنام حضن بحضن وأشباك
وآنه بطرك اللحاف يصل عليه

أريد أرحل براري بعيد وسعه
عله أم شفة الزغيرة وعين وسعه
يا حفار اللحد بالله عليك وسعه
أريد اليوم ياخذنا سويه

إله سنين الفرح وياي مايه
ومو واحد جروح الگلب ميه
اليغص بلگمه إذا ينطوه ميه
آنه بالماي أغص وشلون بيه

ما لان گلبك شما ناح گلبي وشبچه
ومن ما تمر أحس روحي بقفص وشبچه
لا تگلي يا حلو شحن ماكو وشبچه
متت آنه ومسكولك شح عليه

أنه بلياك حته الماي مرمر
گلب شفاف گلبي وانته مرمر
عجب يرضيك يا خلي أتمرمر
هلي والناس والدنيه عليه

سهام عينچ بگلبي حيل شرعن
وسفن حبچ بخليج الروح شرعن
ردت مذهب يحلل البوس شرعا
وإذا ماكو أرد للجاهليه

عرفتك وعرفت لغزك وحلك
سبحان من جملك يا أسمر وحلاك
صعبة أهدنك من إيديه وأحلك
لأن بفراگك تجيني المنيه

اسگي الضامي من شفاك ورده
يلخدك جميل تگول ورده
رديه أحوالي بين الناس وارده
إذا بالبوسة هم تبخل عليه

دگرب يل إلي بدنياي وناس
خزرني وصد حبيبي وگال وناس
گتله انطيني بوسه گال والناس
گتله گلهم أخ يبوس أخيّه

زماني والدهر وياي عنفص
ركبت زمال نص الدرب عنفص
حبيبي الچنت أوده هم اليوم عنفص
زگطني وشمت العدوان بيه

عبرت جبال لعيونك وسهلا
ومصاعب سچتك هانن وسهلن
اجيتك لا گلت أهلا وسهلا
توچيت عله قلبي وخان بيه

منو مثلي تعب لاجلك وداره
وعاش بعيد عن أهله وداره
أريد أعرف منو لعب بعقلك وداره
حبيبي شما يصير انته إليه

حبه شسوه بيه ولعاني
تعال وشوف حالي بعدك والله اعاني
حرت شأهديله گلبي ولا عيني
تعال اخذني بالجملة هديه

الغدر آنه ياحلوه مو طبعي
وجمالچ بالكون والله مو طبيعي
من شفافچ الحلوة موطة بيعي
عشر اكواب حاجز بس اليه

احترك گلبي بسعيرك والتهابك
وترك كل هل الناس والتهه بك
شسبب روحي التودك والتهابك
تفارگهه وتشعل النيران بيه

حبيبك لو يودك صدك جايك
وأخدره من لهيب الگلب چايك
لعبتك شش ليش طلعتلي جا يك
وقفلت الدومنة غصبن عليه

أبوكم ما بچه بگدي ولا امكم
واحس جروحكم بيه والمكم
ياخوتي چفوف ماعندي والمكم
ألمكم بيش يالگطعتوا ايديه

حبيبي الشوك لا تگطع وصاله
إلك بالگلب چم غرفة وصاله
نانسي تروح لك فدوة وأصاله
ووياهن لطيفة التونسيه

اسمك حلو أبوك شلون سماك
وصديقك لو زعل وياك سماك
آنه الصرت سمچة وانته إلي سماك
من أطيح بشبچتك دعطف عليه

سهم صاب الگلب من يوم شفته
عيونه مكحلة وياقوت شفته
سألت العگل عنه شگال شفته
حچيه من شكر فعله سمسميه

يهل رايح لاخونه وصي اخونه
تره الوصخين كثروا وصخونه
بين الموت عشنه والصخونه
يهدنه الموت تتلگانه هيه

حبي أبد ما يوم الك ينگص
وليش الصاحب من يغيب ينگص
وكت خله الحديد بخشب ينگص
وكت خله النذل يلعب عليه

نحبه وما گعد وياه حظنه
وچني من الدفو حسيت حضنه
آنه ما اريد طمع بس ردت احضنه
بس من أحضنه شيفكه من اديه

كافي جفة يحبابي بس عاد
وادعي من رب العرش أيامكم باسعاد
عهدا عليه إذا الغالي بس عاد
أحني چفوفي وادوس المنيه

لا روز اللي حبت مثلي ولا جاك
وحملي ما ينحمل بكرين ولا جك
شكثر تانيته يگلبي ولا جاك
تاليهه يولفي تخون بيه

ريحة حبيبي يا يمه ورد ماي
وثلج يوم الأشوفه أفور وأرد ماي
وأظل أصبر عله جروحي وردماي
متاني هواي بس يسأل عليه

المصايب عگب عينك علي جدت
هزل ويه الغير بس وياي جدت
آنه إيدي أبد ما فد يوم جدت
أبشرك راح أمد اثنين إيديه

الدهر بوري ويصب هموم كاكه
صرت طوبه وحدر رجلين كاكه
لايگ من أصيح عليك كاكه
لأنك موش شمرة ناصريه

أگطع من خدودك ورد واشتم
وما أدري شبقه من العمر وشتم
مرخصك سبني كل ما تريد واشتم
لأن سبتك ثواب لوالديه

آنه روحي رچيچة وحيل خضره
عله أم شعر الذهب وعيون خضره
بعتلهه الگلب وهيه باعتلي خُُُُُُضره
ريحان وكرفس أربعه بميه

وحگ الله وملائكته وكتبه
عجبني شايل الجنطة وكتبه
لعب بيه الدهر والطر وكتبه
بالچذب ما انكسر گلبه و حن عليه

شربت الچاي مرمر باستكانه
ويطعم الچاي خالص باستكانه
سبع بوسات يا عراق بستك آنه
فلا أشبع إذا أوصل الميه

بمحبتك ما أميز شمس من في
وآنه بظلمت عيونك صرت منفي
دمد إيدك بگلبي وشوف من في
غيرك يالتدك ويا سويه

شعجب دفتر عشگنه ما تگلبه
وليش إنته اليگلبك ما تگلبه
تره گلبي بغيابك مات گلبه
گلب گلبي توفه وعم عليه

أبوج اليوم أعوفچ طالباني
وبعدني زغير آنه بحبچ طالب آني
أروح اشكي لجلال اليوم وطالباني
واخلي أحزاب تدخل بالقضيه

دك بيه الدهر حيل وماهراني
لن أنه بحبچ خبير وماهر آني
أصيرلچ فرح ونيشان ومهر آني
وخلي الخلگ كلهه تحچي بيه

گمت من نومتي بالليل جفلان
عله صوتك ينادي گوم جه فلان
گلت معقول گلب اللذي جف لان
وذكر أيام ودنه وحن عليه

تمرة تمرة نتقاسم التمر آنه وياك من تمرنه
وانته حكم هالروح ومسموع أمرك من تمرنه
وتمنيت سوالف العمر أسولفهن إلك من تمرنه
وتالي طلعت مشدوه واحزان الزغر هاجن عليه

آنه لكل أخو أتعب واداري
وأعرفك تعرف البيه وداري
هاي الدار صح دارك وداري
لأن بالخوه عشناهه سويه

وحگ عينك وحگ جفنك ورمشاك
أظل طول العمر أمشي وره مشاك
عندي بالگلب منك ورم شاك
أطيبن من تحط إيدك عليه

الگلب عاف البشر كلهم والك راد
مشه مسافر تذكركم والك رد
عرب ما طيبوا علتي ولا اكراد
دواي انته يهل مبعد عليه

وحگ الله وقضاه بسماه وارضه
بغيرك لا تظن يوم أقتنع وارضه
عشرتي وياك مثل الخشب والأرضه
تلفت عضاي من سكنت بيه

بسواد العين يا اسمر منته رابي
شعجب گلبك تغير من ترى بي
آنه ما ظن ترابك من ترابي
حضنتك والعسل چلب بايديه

رخص گلبي علمودك من رخصتك
واسومن بيك غالي من رخصتك
دست فوك گلبي دگلي من رخصتك
حته براحتك تسحگ عليه

أخوي الچنت أضنه صيدليه
نظرني بعين حاقد صد إليه
طرت أگل لعدوي صيده ليه
العدو تعذر وأخوي الحطهه بيه

عايش مختلي بحالي وخالي
أشوف هواي بعيوني وخلي
عمي ذب علي جمره وخالي
جاب مهفته وهفهه عليه

أشد روحي بحبل شوگك فلا فل
وجندي أگضي العمر يمك فلا فل
يريت بلفتك أصبح فلافل
واحس بطبطة شفافك عليه

غرك گلبي بهواكم برشلونه
چان الوجه صافي أصبح برشلونه
صرت گول وهواكم برشلونه
وألف حرة الحكم دگهن عليه

أزرع ورد واحصد شوك واجني
وغرامك بألف لهبة نار وجني
يجاسي الگلب دمعي حرك وجني
ولا نوبة عطف گلبه عليه

أريد ابچي واذب الدمع بسطول
وعدنه بحور ما تنعبر باسطول
جثير من الزلم يا خوي بس طول
ويصح زغير وافعاله بليه

الدهر ما يوم حن گلبه ولانه
عگب شخصك ألف شامت ولانه
لا إنته عرفت الحب ولا انه
ضلمنه الشوك والعشرة سويه

تظل صاحب فضل وشكبر فضلك
وخلگي ما فضه لغيرك وفض لك
أميزك عل خلگ كله وافضلك
وباسمك أحترز صبح ومسيه

عمر ثاني عله عمرك لزيد واخلي
من بعدك لعوف الدنيه كلهه واخلي
آنه ما يوم نكرت ولفي وخلي
واللي نكرني راح يبچي دموم عليه

هجرك يا ولف صاير بلا حد
مثل سيف اليگص رگبة بلا حد
گلتلي انتظر آنه ارجع بالاحد
إجه الاحد ويمته تمر عليه

عليمن تنفش بريشك وينحاك
وتگول الماي أغزلنه وينحاك
يمكن جسمك تلوحه وينحك
إذا گلبي گرصني شلون بيه

حبيبي لابس المحبس وساعه
وقميصه يا خلگ ما بي وساعه
ساعة ينام المدلل وساعه
يفز مرعوب ريته بين اديه

أريد انصب عزة لروحي واقيمه
بسبب مالي قدر عدكم وقيمه
الناس تغمس بعنبر وقيمه
وآنه راس السلگ حسرة عليه

ألو يللي بغرامك بالي مشغول
أدك رقمك ويطلع ليش مشغول
أخاف بغيري يبن الناس مشغول
شغلتني وما يحن گلبك عليه

سنة دمعي جرح جفني سنة سال
وسنة بطاعون مرضني وسنة سل
وسنة بحبال گيدني وسناسل
وسنة هدني وگصد يلعب عليه

يا طير وياك اخذ مرسال وصله
وخبره الروح بس تريد وصله
إخذ وياك من الگلب وصله
بلكي يشوفهه ويرجع اليه

سن سيفه الدهر بحشاي سنتين
واضن باقي من المشوار سنتين
أخبرك من رصيدي بقن سنتين
اذا عندك رصيد اتصل بيه

عيوني من البواچي عليك صفن
يلجمالك عذب عليك الخلگ صفن
تمر واحنه نوگف يا حلو صفين
صف ينحني وصف ياخذ تحيه

حبيبي اليوم ما بين وما يه
وبهجره نشّف دم الگلب ومايه
جبتله نانسي واصاله ونجوى ومايه
وطلع يدور هيفاء وهبي عليه

أريد ازرع محبة بأرض وسعه
لأبو گصيبة وعين وسعه
يا حفار الگبر بالله أرجوك وسعه
تره ثنينه تصير موتتنه سويه

أقدم روحي بباقة ورد لك
واگولن بعد ما رد وارد لك
چم مرسال من عندي ورد لك
ولا منك جواب يرد عليه

يگلولي تعن أگول شلون ما اعن
وآنه من الضيم حته چلاي ماعن
شكثر عيني بچت للغير ما عين
بچت لي بيوم شح الوكت بيه

مرة تخطأ ومرتين أسامحك عالجرى
وبالثالثة يبن الناس ما تسلم الجره
سهمك بگلبي سنين هالمرة جره
خليني عايش مرتاح يلسهمك شظيه

آنه الصياد وصادتني شبكتك
حالم بيك چن بستك وشبگتك
أدك عليك مشغولة شبكتك
آنه الممنون إذا ترمش عليه

غلطانين يا دنيه تعالي حاسبينه
هوينه عشگنه ومحد حاس بينه
لا إحنه شماتة ولا أحباب حاسبينه
اخذي الگلب والروح ما بقت حنيه

أحس گلبي عليك اليوم لاعب
وكلام الخشن بطله وياي لا عيب
شجاني وگعت بعشگ لاعب
تركني وفضل الطوبة عليه

نضراتك حبيبي بگلبي بسمار
أفرشلك طريقك ورد بس مر
ولو مريت جدمي لزك بسمر
چن ثگلت عليه الجادبيه

بحر حبي يتلاطم لسه مايه
همت والعگل طاير لسمايه
أصيحن وين خلي لسه مايه
ندهت والصدى هوّه الرد عليه

گلبي انته ملكته وانته حر بي
عليل وطبه يمك وانته حير بي
كاس السم أشربه وانتحر بي
ولا غيرك يمس أطراف اديه

لحد الموت منك واصل آني
عفتني وألف شامت واصلاني
قطع صرت منك ووصل آني
دلمهم خاف تندم عليه

يضلعي بيش أجبرنك والحمك
ولا واحد شگف عنك ولا حماك
يجيك الضيم من دمك ولحمك
ومنهم ما تصح بس الأذيه

أريد إلي أحبه يصير جاري
الجرالي ما أظن للناس جاري
ودمع عيني عله الوجنات جاري
يذكركم كل صباح وكل مسيه

مجهول الهوية آنه بلا اسم
ولجروح الگلب ردتك بلاسم
يحية ماي ما تاذي بلا سم
شجاكم كوبرا وصرتوا عليه

أظل أون بحبك بسكوت
وقشمرت أخوك الزغير بباكيت بسكوت
ما ظلت لا بغداد ولا حلة بسكوت
رحت لهناك وانته دور عليه

يحلوة صبحتي دجاجة وأنا ديچ
وانتي بذاك الصوب تناديني واناديچ
يريدوني أبيض وأنا ديج
وهموم الزمن گرگت عليه

حبيبي أرد أرجعلك واراضيك
تفرج دوم بس اصبر ورى ضيگ
تريد نوصل لاهلك واراضيك
دسامحني وارجع بين اديه

حبكم الي شگد ردته يزيد و ما زاد
گعدتنه سوه صح ملح بس مو زاد
عرضتوني بسوك هرج و صحتوا بيه مزاد
تالي هلي واصحابي يبيعون ويشترون بيه

إلمن اشكي هموم الدهر واشرح
وما أدري شبقه من العمر وشراح
الناس أفخاذ تاكل لحم واشراح
وآنه العظمات ما تحصل بإديه

حبك سوالي ويه الناس مشكله
مو بيدي گلبي بگلبكم مشكله
هم لو ينطيني نصه مش كله
واعيش وآنه الممنون بالنطيه

لأجل عينك لشد رتبة ملازم
ويللي بحبك أظل أطبع ملازم
إذا ما رايدني عوفني ملازم
ألف واحد يذب روحه عليه

خضر عيونه والرموش شگره
ما أعرف گراية بس گلي شگره
منك شربت الچاي بدون شكره
بس لا يوم تشوفني الأذيه

حبك زيد جروحي والالام
گلبي ما مرة عاتبني ولا لام
منك كلشي ما مجمع ولا لام
غير هموم واحزان وأذيه

ها ناح الگلب ها صرخ ها ون
ها وينك صرت محبوبي ها وين
حبيبي إجه وضرب عالگلب هاون
فجرني وگعد يبچي عليه

أبد مو عشرة هاي وياك طلعت
ومن كثر الهموم الروح طلعت
شفت مرة شمس آنه بليل طلعت
أگل للناس ما يصدگون بيه

حاروا بقصتي ذو عقول والباب
شلعت شباك گلبي بهجرك والباب
بيتي يرحب باليقدمولي والباب
يرحب باليجون صبح ومسيه

آنه أول أحبك وآخر آني
وسبب العطلني أجيلك وأخراني
الگلب من ردت أشبگك وخراني
طلع مني يشبگك گبل اديه

يبنية حسي بحبي وشعري
وگلبي شيب بهجرج وشعري
لغيرج چذب ما يصح نثري وشعري
ولو كل الشعر ما يوفي اللي بيه

لغيرك ماجره دمعي ولا هل
غاب الگمر من شافك ولا هل
مالي جار بهالديرة ولا اهل
بس انته گطعت الوصل بيه

آنه بچفي وتد للناس دگيت
ولا دگة نذل بالناس دگيت
بعدني ما طحت وانته طبول دگيت
شد وصلة بعد وارگص عليه

سچاچين الدهر بحشاي بردن
حزني وصرت بالصيف بردان
گمت مجبور أشد ردان بردان
ولا مد للشماتة چفوف اديه

إجيت امشي بتوالي الليل واسعه
عله أم شعر الطويل وعيون وسعه
يا حافر گبر لهواي بالله عليك وسعه
أريد آني وحبيبي نندفن بي سويه

أحبك حب ماينوصف وصفه
وحبي إلك مثل الذهب واصفه
مريض آني ودكتوري وصفلي وصفه
وخدودك والشفايف صيدلـيه

بوجودك چنت ازيح الحزن واجلي
ومصابك نار وسط الگلب وج لي
ردت گبلك مماتي يصير واجلي
لچن حكم الله هاذه مو بايديه